Særskilte steinar på Bleik

  

Maristeinen - med kleva i - og Dammen

Kilde: Myrvang, Finn. 1976. I Trollbotn: Folkeminne frå Andøya. Noregs Boklag.
Opphavsrett: Finn Myrvang
Vilkår for bruk:

Rett attom Steinhågen - på hi sida hola - er det ein stor stein med ei kleva i, Bryllupssteinen kalla. Søraust for Bryllupssteinen, tett att­med stia der de gjekk når de skulle til vatnet, ligg Huldersteinen: Det var på Martin Nordheim sin teig.

Inst på Vassraet ligg den store Godbonsteinen, der folk sa at godbonden budde. - Rett nord for den og austom Maristeinmyra ligg Maristeinen: Ungane kunne fortelle at den som greidde å krype igjønna kleva i den steinen, han skulle bli salig. Og i Dammen, ei rund lita tjønn att­med, sa de at jomfru Maria hadde vaska Jesusbanet.

Går du så vestover Ra og nerover mot havet, ligg der to store steinar tett nedafor, imella Litjesletta og Storsletta: De steinane kaltest Hesten og Merra, og de hadde vel sine sagn ein gong, de òg.

Nedmed fjæra rett nedafor Ålsvatnet låg det før ein stor stein de kalla Kalvesteinen: Det var den tid det var gjengs at folk slepte kalvane der vest. Nu er steinen bortskoten.

Oppå marka rett sørvest for Elvesvingen ligg det ein stein innimella husan ein stad som heiter Vargesteinen. Før i tida låg han eit godt stykkje bortom sjølve Bleiks-gården.

På raet vestom Haugraelva (Haurelva) låg det ein stein som det var ei hola under, Pyntarsteinen kalla: Der brukte Stava-karane å skifte kleda og hatte seg litt, når de nærma seg Bleiks-gården. Gammelhyret la de att under Pyntarsteinen, og så tok de det på når de kom til bakers, på heimturen.

Ovom Halsemyra - tett pund fjellet - ligg det to store og høge Steinar som berre blir kalla Gråsteinan. De var lenge brukt som seglmerke.