Tauet i Hågan

Ein finnlendar som heitte Josse var dreng hos ei kona på Nordmela. Han fann livet så tungt at han gjekk inn i Hågan austom Nøssdalen og hengte seg. De rekte då faret etter han og fekk han ned. Fotefaran var så kjennelig, for han hadde heilsmidde jarn under skoene, det vil seie der var eit tverrstykkje smidd fast imella spissane fremst på hæljarnet.

Tauet han brukte blei liggande igjen. Det seiest at ho han tjente hos var der seinare og skar ris. Ho tok då tauet og la risbørra i, men den børra var uvanlig tung å bere. Det heiter at ho blei stiv i fingrane etter det.

Andre har fortalt at det var i Hanselia i Finnkondalen ho var og skar ris. Den lia har elles namn etter han Hans Persa på Nøss som var der for å leite seg gagnved. Så kom snyskreda og tok han.